KRİMİN AL XƏBƏRLƏR
DİN-İN MƏLUMATI
[2 mart 2009]
Bakının Mərdəkan qəsəbəsində ağır yol qəzası baş verib. Bakı sakini 24 yaşlı Elşad Vəliyev idarə etdiyi «Nissan» markalı avtomobili qaz borusuna vurub. Boru çatladığından yanğın baş verib. Daxili İşlər Nazirliyinin məlumatına görə, nəticədə avtomaşındakı sərnişin hadisə yerində keçinib. Sürücü isə xəstəxanaya yerləşdirilib.
Bərdə də ağır yol qəzası olub. Rayon sakini Zaur Qurbanov idarə etdiyi «QAZ-31-10» markalı avtomobillə həmyerlisi Mehman Təhməzovu vurub. Xəsarət alan şəxs xəstəxanaya yerləşdirilsə də onun həyatını xilas etmək mümkün olmayıb.

Beyləqanda bədbəxt hadisə baş verib. Rayonun 2-ci Aşıqlar kənd sakini 20 yaşlı İlhami Əlizadə hasardan tullanarkən asılqanın ipi boğazına dolanması nəticəsində boğulub. Faktla əlaqədar cinayət işi başlanıb.

Bakının Nərimanov rayonunda bıçaqlanma hadisəsi olub. Münaqişə zəminində Ağdaş sakini 27 yaşlı Tərlan Nəsirova bıçaqla xəsarət yetirən Ədliyyə Nazirliyinin Penitensiar Xidmətinin 5 saylı Məntəqə Tipli Cəzaçəkmə Müəssisəsində cəza çəkən, əvvəllər məhkum olunmuş 50 yaşlı Bədəl Kazımov tutulub.

Paytaxtın Binəqədi rayonunda isə oğurluq edən şəxs yaxalanıb. Bakı sakini Əjdər Vəliyevin avtomobilindən oğurluq edən Ədliyyə Nazirliyinin Penitensiar Xidmətinin 4 saylı Məntəqə Tipli Cəzaçəkmə Müəssisəsində cəza çəkən Vüsal Hüseynovun ətrafında aparılan əməliyyat tədbirləri nəticəsində, onun daha 2 ayrı-ayrı avtomobildən oğurluq etməsi müəyyən edilib. Təqsirləndirilən şəxs saxlanılıb.
**
Bakının Əzizbəyov rayonunda yanğın olub. Hilal Süleymanovun evində baş verən yanğın nəticəsində 150 kvadratmetr sahədə evin yanar konstruksiyaları və oradakı əşyalar yanıb.

Bu gecə Göyçay rayonunda isə Uşaq Poliklinikasının xidməti otaqlarından birində yanğın baş verib. Nəticədə 12 kvadratmetr sahətə yanar konstruksiyalar yanıb.

Sumqayıt dələduzluqla məşğul olan şəxs yaxalanıb. Hacı Zeynalabdin Tağıyev qəsəbə sakini Mirzəbala Məlikovun etimadını qazanaraq 5.500 dollar pul aldığına görə tutulan Köhnə Katec qəsəbə sakini Rafiq Cəlilovun ətrafında aparılmış əməliyyat tədbirləri nəticəsində, onun Qubadlı sakini Əlövsət Əliyevdən də 5.900 dollar pul alması müəyyən edilib.

Ötən gün ərzində, 1 qəsdən sağlamlığa ağır zərər vurma, 1 sayğunçuluq kimi ağır cinayət hadisəsi də daxil olmaqla, ümumilikdə 21 cinayət faktı qeydə alınıb. Həyata keçirilən təxirəsalınmaz tədbirlər nəticəsində onlardan 7-si «isti izlərlə» açılıb. Ötən günlərdən bağlı qalan 2 cinayət faktıda açılıb. Cinayət törətdiklərinə görə 9 nəfər, o cümlədən 2 nəfərdən ibarət 1 qrup tutulub. Bu və ya digər cinayətlərlə bağlı axtarışda olan 2 nəfər də yaxalanaraq istintaq orqanına verilib. Ölkədə kriminogen durum nəzarətdə saxlanılmaqla, ictimai asayişin qorunması və ictimai təhlükəsizliyin təmini istiqamətində tədbirlər davam edir. Xatırladım ki, Daxili İşlər Nazirliyinin «102» xidməti gün ərzində müraciətlərinizi qəbul etməyə hazırdı.
Unutmuyaq ki, qanun qorumaq və ona riayət etmək hər birmizin borcudur. /İctimai TV/