KRİMİNAL XƏBƏRLƏR
DİN-İN MƏLUMATI
[4 fevral 2009]
Gəncə şəhəri Nizami rayonu sakini 32 yaşlı Əli Rəhimov bıçaqlanıb. Keçirilən əməliyyat-axtarış tədbirləri nəticəsində, ona xəsarət yetirən şəxsin Göygöl rayon sakini, əvvəllər məhkum olunan 21 yaşlı Arif Əliyev oğlu tutulub. İlkin məlumata əsasən hadisə xuliqanlıq zəminində törədilib. Belə ki, küçədə gənclər arasında başlayan mübahisəyə Arif Əliyev bıçaqdan istifadə etməklə son qoyub.
**
Ötən gün Ağcabədi rayonunda da bıçaqlanma hadisəsi baş verib. Rayonun Aran kənd sakini, 39 yaşlı Arif Əzizov qısqançlıq zəminində, həyat yoldaşı 32 yaşlı Ruhiyyəyə bıçaqla xəsarət yetirib. Daxili İşlər nazirliyinin məlumatına görə Arif Əzizov tutulub. Faktla əlaqədar cinayət məcəlləsinin qəsdən sağlamlığa ağır zərər vurma maddəsi ilə cinayət işi başlanmışdır.
**
Bakının Nəsimi rayonu Bakıxanov küçəsində isə naməlum avtomobil Cəlilabad rayon sakini, 36 yaşlı Cəmil Dövlətovu vurub. Hadisə axşam saat 23:50 radələrində baş verib. Nəticədə, xəsarətlə xəstəxanaya yerləşdirilən Cəmil Dövlətov ölüb. Piyadanın ölümü ilə nəticələnən yol-nəqliyyat hadisəsi törədən sürücünün tapılıb məsuliyyətə cəlb olunması istiqəmətində zəruri tədbirlər görülür.
**
Ümumilikdə ötən gün ərzində 1 nəfərin ölümü, 3-nün yaralanması ilə nəticələnən 4 yol-nəqliyyat hadisəsi qeydə alınıb.
**
5 №-li xətt avtobusunda, Lökbatan qəsəbə sakini, 29 yaşlı Şəbnəm Cənnətovaya qarşı zor tətbiq edərək 280 manat pulunu alan, Sahil qəsəbə sakini, 26 yaşlı Zahir Qarayev tutulub.
**
Oxşar cinayət faktı Nəsimi rayonunda da qeydə alınıb. Rayonun Əbilov küçəsində, naməlum şəxs, Bakı şəhər sakini, 24 yaşlı Elgün Qədirova qarşı zor tətbiq edərək mobil telefonunu ondan alıb. Keçirilmiş əməliyyat-axtarış tədbirləri nəticəsində, Elgün Qədirova qarşı soyğunçuluq edib hadisə yerindən qaçan Ceyhun Məmmədov tutulub.
**
Masallı rayonunda isə Ziya Vəliyevin mənzilindən açar seçmək yolu ilə oğurluq edən Masallı şəhər sakinləri, 22 yaşlı Ramil Cəfərov, 20 yaşlı Yaşar Əliyev və Qasımlı kənd sakini, 18 yaşlı Fariq Əkbərov tutulub. Hər üç şəxs ətrafında aparılan əməliyyat tədbirləri nəticəsində, onların, şəhər sakinləri Şövlət İsayev və Sahib Həşimovun mənzillərindən də qapını sındırmaq yolu ilə məşiət cihazları oğurlamaları müəyyən edilib.
**
Suraxanı rayon polis idarəsinin 33-cü Polis Bölməsinin əməkdaşları tərəfindən Yevlax rayon sakini, 31 yaşlı Tofiq Məmmədov dan 1 kq 200 qr marixuana götürülüb.
**
Əzizbəyov rayonunda Rövşən Əliyevə narkotik vasitəni satan Zabrat qəsəbə sakini, əvvəllər məhkum olunan 53 yaşlı Rəhim Şirinov tutulub. Ondan narkotik vasitə olan heroin götürülüb. Bundan başqa Rövşən Əliyevin qeyri rəsmi nigah münasibətlərində olduğu 42 yaşlı Dürdanə Qəndimovanın yaşadığı «Kəşfiyyatçı» düşərgəsinə baxış keçirilən zaman oradan da heroin aşkar edilərək götürülüb.
**
Ümumilikdə həyata keçirilən əməliyyat-axtarış tədbirləri nəticəsində ötən gün narkotik və güclü təsiredici maddələrlə əlaqədar 15 cinayət hadisəsi müəyyən edilib, silah, döyüş sürsatı və partlayıcı maddələrlə bağlı 5 fakt aşkarlanıb.
**
Ötən gün ərzində 3 qəsdən sağlamlığa ağır zərər vurma, 1 soyğunçuluq kimi ağır cinayət hadisəsi də daxil olmaqla, ümumilikdə 44 cinayət faktı qeydə alınıb. Həyata keçirilən təxirəsalınmaz tədbirlər nəticəsində onlardan 27-si «isti izlərlə» açılıb. Ötən günlərdən bağlı qalan 2 cinayət faktı da açılıb. Cinayət törətdiklərinə görə 34 nəfər, o cümlədən 5 nəfərdən ibarət 2 qrup tutulub. Bu və ya digər cinayətlərlə bağlı axtarışda olan 6 nəfər də yaxalanaraq istintaq orqanına verilib. Ölkədə kriminogen durum nəzarətdə saxlanılmaqla, ictimai asayişin qorunması və ictimai təhlükəsizliyin təmini istiqamətində tədbirlər davam edir. Xatırladım ki, Daxili İşlər Nazirliyinin «102» xidməti gün ərzində müraciətlərinizi qəbul etməyə hazırdı.
Unutmayaq ki, qanun qorumaq və ona riayət etmək hər birmizin borcudur. /İctimai TV/