AZƏRBAYCANDA MÜXALİFƏT PARTİYALARI BEYNƏLXALQ TƏŞKİLATLARA MÜRACİƏT ÜNVANLAYIB
[5 fevral 2009]
Bu gün Azərbaycanda fəaliyyət göstərən bir qrup müxalifət partiyası Ermənistan-Azərbaycan Dağlıq Qarabağ münaqişəsinin həllinə dair BMT Təhlükəsizlik Şurasına, Avropa Birliyi Parlament Assambleyasına, ATƏT, AŞ PA, ABŞ Prezidenti Barak Obama, Rusiya prezidenti Dmitrii Medvedev, Fransa prezidenti Nikola Sarkozi və xarici ölkələrin Azərbaycandakı səfirliklərinə rəsmi müraciət ünvanlayıb. Müraciətdə qeyd olunur ki, beynəlxalq təşkilatlar və Minsk qrupunun həmsədrləri olan ölkələrin işğalçı Ermənistana qarşı zəruri sanksiyalar tətbiq etməməsindən sui-istifadə edən ermənilər zəbt olunan Azərbaycan ərazilərində qanunsuz məskunlaşma həyata keçirir, xarici şirkətlərin iştirakı ilə həmin ərazilərdə təbii sərvətləri mənimsəyir, mədəni və tarixi abidələri məhv edirlər. Bu faktlar ATƏT və Avropa Şurasının faktaraşdırıcı missiyalarının hesabatlarında da dəfələrlə təsdiq olunub. Buna baxmayaraq, Minsk qrupunun həmsədrləri ikili standartlardan və ermənipərəst mövqedən çıxış edərək Ermənistanı işğalçı dövlət kimi tanımır. Sənədi imzalayan siyasi partiyalar hesab edirlər ki, Dağlıq Qarabağ münaqişəsinin ədalətli həlli üçün BMT Təhlükəsizlik Şurasının müvafiq qətnamələri, BMT Baş Assambleyasının qətnamələri, o cümlədən 14 mart 2008-ci il tarixli qətnaməsi təxirəsalınmadan, qeyd-şərtsiz icra edilməli, Ermənistanın işğalçı qoşunları Azərbaycan ərazilərindən çıxarılmalı, azərbaycanlı məcburi köçkünlər öz doğma yurdlarına qayıtmalıdır. Ermənistan-Azərbaycan münaqişəsinin nizamlanmasına dair Minsk qrupu həmsədrləri tərəfindən irəli sürülən baza prinsipləri layihəsinə Azərbaycanın ərazi bütövlüyü və unitar dövlət quruluşunun pozulmasına rəvac verən müddəalar daxil edilməməli, Dağlıq Qarabağın statusu Azərbaycanın beynəlxalq miqyasda tanınmış sərhədlərinin toxunulmazlığı və unitar dövlət quruluşunun qorunub saxlanması çərçivəsində həll olunmalıdır. Ermənistan təcavüzkar dövlət olaraq, Azərbaycana vurduğu böyük maddi və mənəvi zərərə müvafiq miqdarda təzminat ödəməli, BMT Təhlükəsizlik Şurası və digər beynəlxalq təşkilatlar Ermənistanı təcavüzkar dövlət kimi tanımalı və öz statuslarına müvafiq olaraq Ermənistana qarşı iqtisadi, siyasi və lazım gələrsə, hərbi sanksiyalar tətbiq etməlidirlər. / İctimai TV /