KRİMİNAL XƏBƏRLƏR
DİN-İN MƏLUMATI
[5 mart 2009]
Bu gecə saat 1 radələrində Sumqayıtın Təzə Corat qəsəbəsində Seyidxanım Mustafayevaya məxsus evdə təbii qaz sızmasından ani partlayış baş verib. Nəticədə, yanıq xəsarəti alan Səidə və qızı 22 yaşlı Könül xəstəxanaya yerləşdirilib. Onların vəziyyəti orta-ağırdır.
**
Bakının Nərimanov rayonunda əvvəllər məhkum olunmuş, 44 yaşlı Ayəddin Babayevdən heroin, qapı açmaq üçün xüsusi qarmaqlar və 76 müxtəlif açar götürülüb. Onun evinə baxış zamanı 22 min 800 dollar pul və qızıl əşyaları aşkar edilib. Faktla bağlı araşdırma aparılır.
**
Neftçala rayonunda atanın oğulu cəzalandırması ölümlə nəticələnib. Belə ki, Bankə qəsəbə sakini, 42 yaşlı Əli Fərəcov oğlu 12 yaşlı Hacıağanı döyüb. Xəsarətlə xəstəxanaya yerləşdirilən Hacıağa bir gün sonra həyatını dəyişib. Ata polisə verdiyi ifadəsində hadisənin oğlunu evə gec gəldiyinə, tüfeyli həyat tərzi keçirməyə meyl göstərdiyinə görə tənbeh edərkən yaranan mübahisə nəticəsində baş verdiyini bildirib.
**
Salyanın Arbatan kəndində isə 46 yaşlı İlham Allahverdiyevlə 49 yaşlı Şahin Qasımov münaqişə zəminində bir-birinə bıçaqla xəsarət yetiriblər.
**
Ötən axşam Yevlaxda İsmayılabad kənd sakini, 28 yaşlı Azər Qəhrəmanov kəsilmiş-deşilmiş xəsarətlə xəstəxanaya gətirilib. Həkimlər yaralının həyatını xilas edə bilməyiblər. Valildeynləri Azərin evin damından yıxıldığını bildiriblər.
**
Ötən gün Bakının Azadlıq prospektində 50 yaşlı Rəfayel Qurbanov «Mersedes» markalı avtomaşını idarə edərkən, 61 yaşlı Nailə Həsənovanı vurub. Yaşlı qadın xəstəxanaya çatdırılsa da, onun həyatını xilas etmək mümkün olmayıb.
**
Yaşlı qadının ölümünə səbəb olan digər bir yol nəqliyyat hadisəsi Şəmkirdə baş verib. 28 yaşlı Babək Cəbişov «VAZ-2107» maşını ilə 71 yaşlı Simuzər Nadirovanı vurub. Xəstəxanaya aparılan qadın orada keçinib.
**
Ümumilikdə ötən gün ərzində 3 nəfərin ölümü, 5-nin yaralanması ilə nəticələnən 6 yol-nəqliyyat hadisəsi qeydə alınıb.
**
Bakının Nizami rayonunun ərazisindən Göyçay rayon sakini, 29 yaşlı Vüsal Salahov kəsilmiş-deşilmiş xəsarətlə xəstəxanaya gətirilib. Əməliyyat-axtarış tədbirləri nəticəsində Vüsala xəsarətin Gəncə şəhər sakini, 21 yaşlı Yeganə Mustafayeva tərəfindən yetirildiyi müəyyən edilib.
**
Ötən gün Bakının Heydər Əliyev prospektində Taleh Abbasova məxsus «AzSamand» markalı avtomaşını qaçıran əvvəllər məhkum olunmuş, 38 yaşlı Rəhman Quliyev tutulub.
**
Bakıda digər bir avtomaşın qaçırma cəhdi isə uğursuz nəticələnib. Bu gecə saat 1 radələrində 2 naməlum şəxs Cəbrayıl rayon sakini, Çingiz Mahmudova qarşı zor tətbiq edərək, onun «VAZ-2106» maşınını almağa cəhd göstəriblər. Abşeron rayon polis şöbəsi əməkdaşlarının keçirdikləri operativ əməliyyat-axtarış tədbirləri nəticəsində, hadisənin, Kəlbəcər rayon sakinləri 30 yaşlı Bəhmən Hüseynovla həmyaşıdı Afiq Alıquluyev tərəfindən törədilməsi müəyyən edilib.
**
Ümumilikdə həyata keçirilən əməliyyat-axtarış tədbirləri nəticəsində ötən gün narkotik və güclü təsiredici maddələrlə əlaqədar 10 cinayət hadisəsi müəyyən edilib, silah, döyüş sürsatı və partlayıcı maddələrlə bağlı 9 fakt aşkarlanıb.
Ötən gün ərzində, 3 qəsdən sağlamlığa ağır zərər vurma, 4 soyğunçuluq, 3 xuliqanlıq kimi ağır cinayət hadisəsi də daxil olmaqla, ümumilikdə 43 cinayət faktı qeydə alınıb. Həyata keçirilən təxirəsalınmaz tədbirlər nəticəsində onlardan 25-i «isti izlərlə» açılıb. Ötən günlərdən bağlı qalan 6 cinayət faktıda açılıb. Cinayət törətdiklərinə görə 36 nəfər, o cümlədən, 4 nəfərdən ibarət 2 qrup tutulub. Bu və ya digər cinayətlərlə bağlı axtarışda olan 7 nəfər də yaxalanaraq istintaq orqanına verilib. Ölkədə kriminogen durum nəzarətdə saxlanılmaqla, ictimai asayişin qorunması və ictimai təhlükəsizliyin təmini istiqamətində tədbirlər davam edir. Xatırladaq ki, Daxili İşlər Nazirliyinin «102» xidməti gün ərzində müraciətlərinizi qəbul etməyə hazırdı.
Unutmayaq ki, qanun qorumaq və ona riayət etmək hər birmizin borcudur. /İctimai TV/