KRİMİNAL XƏBƏRLƏR
DİN-İN MƏLUMATI
[9 fevral 2009]
Xocavənd rayon sakini, 39 yaşlı Dayandur Abdullayev bıçaq yarası ilə Beyləqan şəhər ərazisindən xəstəxanaya gətirilib. Keçirilən əməliyyat-axtarış tədbirləri nəticəsində, hadisəni qrup şəklində törədən şəxslər -Şərq qəsəbə sakinləri, 40 yaşlı Nəsrullah Nöhəlov, 23 yaşlı Yasin Mehdiyev, 35 yaşlı Əyyub Mehdiyev və onun qardaşı, 30 yaşlı İbadət müəyyən olunub.

Balakən rayonunda da oxşar hadisə baş verib. Gərəkli kənd sakini, 25 yaşlı YUSİF MUQUMOV bıçaq yarası ilə xəstəxanaya gətirilib. Axtarış tədbirləri nəticəsində Yusif Müqümova məişət zəminində bıçaqla xəsarət yetirən Tülü kənd sakini, əvvəllər məhkum olunmuş, 27 yaşlı Ceyhun Xəlilov yaxalanıb.

Ağcabədi rayonunun Ağbulaq ərazisində də münaqişə zəminində bıçaqlanma hadisəsi qeydə alınıb. Göygöl rayon sakini, Ramiz Yusifov Daşkəsən rayon sakini İmamverdi Allahverdiyevə bıçaqla xəsarət yetirib. Hadisəni törədən şəxs tutulub.

Daha bir Ağcəbədi rayon sakini, Adil Hacıyev isə Mingəçevir şəhər xəstəxanasının ərazisində naməlum şəxs tərəfindən bıçaqlanıb. Keçirilən əməliyyat-axtarış tədbirləri nəticəsində Adil Hacıyevə qısqanclıq zəminində bıçaqla xəsarət yetirən şəxsin kimliyi müəyyən olunub. Ağcabədi rayon sakini, Niyaz Nəcəfov tutulub.

Bakının 1-ci Zabrat qəsəbəsində Ağdam rayon sakini 51 yaşlı Şəhla Rzayevanı bıçaqla hədələyərək 200 manat pul və qızıl əşyalarını ondan alan Biləsuvar rayon sakini, əvvəllər məhkum olunmuş, 32 yaşlı Hikmət Ağayev tutulub.

DİN-in Baş Mütəşəkkil Cinayətkarlıqla mübarizə İdarəsinin Əməkdaşları narkotik maddə olan heroin və tiryək satan şəxsi yaxalayıb. Keçirilən əməliyyat-axtarış tədbirləri nəticəsində Ceyhun Abışov narkotik vasitəni satan Salyan rayon sakini, 1977-ci il təv. Elnur Nəzərov tutulub. Onun evinə baxış zamanı 40 qram heroin və 970 qram həşiş aşkar edilərək götürülüb.

Fevralın 8-də saat 14.00 radələrində, Qaradağ rayonu Korgöz qəsəbəsindəki daş karxanasında işləyən, Gürcüstan vətəndaşı, 1963-cü il təvəllüdlü Kamal Sarıməmmədov elektrik cərəyanı vurması nəticəsində həlak olub. Araşdırmalar aparılır.

Ötən gün səhər saatlarında Binəqədi rayonu Məmməd Əmin Rəsulzadə qəsəbə sakini, Mübariz Məmmədovun evində təbii qazın sızması nəticəsində partlayış baş verib. Hadisə nəticəsində yanıq xəsarəti alan Mübariz Məmmədov və qonağı, Seyhunə Zeynalova xəstəxanaya yerləşdirilib. Zərərçəkənlərin vəziyyəti qənaətbəxşdir. Araşdırmalar aparılır.

Fevraldın 8-də saat 17.00 radələrində, Zaqatala rayonu Axaxdərə kənd sakini, Həbibulla Qurbanova məxsus ümumi sahəsi 60 kvm olan 1 mərtəbəli 2 otaqlı evdə yanğın baş verib. Nəticədə, bütövlükdə evin yanar konstruksiyaları və oradakı əşyalar yanıb.

Ümumilikdə həyata keçirilən əməliyyat-axtarış tədbirləri nəticəsində ötən gün narkotik və güclü təsiredici maddələrlə əlaqədar 14 cinayət hadisəsi müəyyən edilib, silah, döyüş sürsatı və partlayıcı maddələrlə bağlı 2 fakt aşkarlanıb.

Ötən gün ərzində 2 qəsdən sağlamlığa ağır zərər vurma, 2 quldurluq, 1 soyğunçuluq kimi ağır cinayət hadisəsi də daxil olmaqla, ümumilikdə 28 cinayət faktı qeydə alınıb. Həyata keçirilən təxirəsalınmaz tədbirlər nəticəsində onlardan 22-si «isti izlərlə» açılıb. Cinayət törətdiklərinə görə 29 nəfər, o cümlədən 2 nəfərdən ibarət 1 qrup tutulub. Bu və ya digər cinayətlərlə bağlı axtarışda olan 9 nəfər də yaxalanaraq istintaq orqanına verilib. Ölkədə kriminogen durum nəzarətdə saxlanılmaqla, ictimai asayişin qorunması və ictimai təhlükəsizliyin təmini istiqamətində tədbirlər davam edir. Xatırladaq ki, Daxili İşlər Nazirliyinin «102» xidməti gün ərzində müraciətlərinizi qəbul etməyə hazırdı.
Unutmayaq ki, qanun qorumaq və ona riayət etmək hər birmizin borcudur. /İctimai TV/