KRİMİNAL XƏBƏRLƏR
DİN-İN MƏLUMATI
[10 fevral 2009]
Bakının Binəqədi rayonu ərazisində, 19 yaşlı Tərlan Həsənov sürücü işlədiyi «İveko» markalı avtomaşında, Quba rayon sakini, 37 yaşlı Nəzihə Bayramovanı bıçaqla hədələyərək 170 manat pulunu alıb və qadını zorlamağa cəhd göstərib. Tərlan Həsənov tutulub.

Bakının Nizami rayonu 235 №-li xətt avtobusunda isə oğurluq hadisəsinin qarşısı alınıb. Neftçala rayon sakini, 32 yaşlı Samirə Quliyevaya qarşı zor tətbiq edərək mobil telefonunu ondan alıb qaçmağa cəhd göstərən Sumqayıt şəhər sakini, 27 yaşlı Faiq Süleymanov Çevik Polis Alayının əməkdaşları tərəfindən tutulub.

Bu gücə saat 01.00 radələrində Bakının Xətai rayonu Nobel prospektində bədbəxt hadisə baş verib. Bakı sakini 74 yaşlı Mikayıl İsayev körpüdən yıxılaraq həlak olub.

Fevralın 9-da saat 16.00 radələrində, Xaçmaz şəhər sakini, Nəzakət İsmayılovaya məxsus ümumi sahəsi 32 kvm olan evdə yanğın baş verib. Yanğın söndürüldükdən sonra ərazidə kirayədə yaşayan Xaçmaz rayon sakini, 1954-cü il təvəllüdlü Olqa Koçnevanın yanmış meyiti tapılıb. Araşdırma aparılır.

Gəncə şəhərində ağır yol-qəza hadisəsi baş verib. Dədə Qorqud küçəsi ilə hərəkət edən “VAZ-21099” markalı avtomobil Tağı Arani küçəsindən çıxan “VAZ 2106” markalı avtomobillə toqquşub. Sürət məhdudiyyətinə əməl edilməməsi nəticəsində baş verən hadisə zamanı hər iki avtomobilin sürücüsü İlqar Məmmədov və İlham Ismayılov , sərnişin Nuriyyə Həsənzadə ağır bədən xəsarəti alıb. Hadisənin baş verdiyi ərazinin yaxınlıqdakı parkda işləyən Əli Adıgözəlov da xəsarət aldığından onlar şəhər təcili tibbi yardım xəstxanasına yerləşdirilib.

Rövşən Abdullayev adlı şəxsin «VAZ-2107» markalı avtomaşınla birgə oğurlanması barədə verilən məlumatla əlaqədar, Rövşən Abdullayev polis tərəfindən Bakı-Quba yolunun 22-ci-də saxlanılıb. Araşdırmalar zamanı adı çəkilən şəxsin ayrı-ayrı vətəndaşlara pul borcu olduğundan yalan məlumat verməsi müəyyən edilib.

Yardımlı rayon sakini, 29 yaşlı Vasif Əliyev 4 kq 850 qr heroini qaçaqmalçılıq yolu ilə İrandan Azərbaycana gətirib satarkən tutulub. Üzərində aparılan yoxlanış nəticəsində ondan 1 ədəd xəncər də götürülüb. Vasif Əliyevin evinə baxış zamanı isə əlavə 44 qramdan çox tiryək aşkar edilərək götürülüb.

Əzizbəyov Rayon Polis İidarəsinin əməkdaşları isə Füzuli rayon sakini, 41 yaşlı RasimAtakişiyevdən 1 kq həşiş müsadirə edib.

Ümumilikdə həyata keçirilən əməliyyat-axtarış tədbirləri nəticəsində ötən gün narkotik və güclü təsiredici maddələrlə əlaqədar 11 cinayət hadisəsi müəyyən edilib, silah, döyüş sürsatı və partlayıcı maddələrlə bağlı 12 fakt aşkarlanıb.

Ötən gün ərzində 2 quldurluq, 1 soyğunçuluq, 3 xuliqanlıq kimi ağır cinayət hadisəsi də daxil olmaqla, ümumilikdə 34 cinayət faktı qeydə alınıb. Həyata keçirilən təxirəsalınmaz tədbirlər nəticəsində onlardan 26-sı «isti izlərlə» açılıb. Ötən günlərdən bağlı qalan 4 cinayət faktı da açılıb. Cinayət törətdiklərinə görə 28 nəfər, o cümlədən 3 nəfərdən ibarət 1 qrup tutulub. Bu və ya digər cinayətlərlə bağlı axtarışda olan 6 nəfər də yaxalanaraq istintaq orqanına verilib. Ölkədə kriminogen durum nəzarətdə saxlanılmaqla, ictimai asayişin qorunması və ictimai təhlükəsizliyin təmini istiqamətində tədbirlər davam edir. Xatırladaq ki, Daxili İşlər Nazirliyinin «102» xidməti gün ərzində müraciətlərinizi qəbul etməyə hazırdı.
Unutmayaq ki, qanun qorumaq və ona riayət etmək hər birmizin borcudur. /İctimai TV/