AZƏRBAYCAN PREZİDENTİ İLHAM ƏLİYEVİN KÜVEYTƏ RƏSMİ SƏFƏRİ DAVAM EDİR
[11 fevral 2009]
Ötən gün Əl-Küveyt hava limanında dövlət başçısını Küveyt dövlətinin əmiri şeyx Sabah əl-Əhməd əl-Cabir əs-Sabah, Küveyt vəliəhdi şeyx Nəvvaf əl-Əhməd əs-Sabah və digər rəsmi şəxslər qarşılayıb. Daha sonra isə Azərbaycan Prezidenti İlham Əliyev üçün ayrılan iqamətgahda -“Bəyan” sarayında onun Küveyt Ticarət və Sənaye Palatası idarə heyətinin sədri Əli Məhəmməd Sünayən əl-Ğənim ilə görüşu olub. Danışıqlarda ölkələrimiz arasında siyasi əlaqələrin yaxşı səviyyədə olduğu, beynəlxalq təşkilatlar çərçivəsində əməkdaşlığın genişləndiyi məmnunluqla vurğulanıb. Qarşılıqlı iqtisadi-ticarət əlaqələrinin mövcud potensiala cavab vermədiyi bildirilən görüşdə bu əlaqələrin genişləndirilməsi üçün konkret tədbirlərin görülməsinin zəruriliyi qeyd olunub. Söhbət zamanı qarşılıqlı investisiyaların qoyulması, birgə müəssisələrin yaradılması və digər konkret istiqamətlərdə işlərin görülməsinin vacibliyi vurğulanaraq əməkdaşlığın genişlənəcəyinə əminlik ifadə olunub. Azərbaycanın dövlət başçısının Küveyt Milli Məclisinin sədri Casim Məhəmməd əl-Xərafi ilə görüşündə isə
Parlamentlərarası əlaqələrin əhəmiyyətindən danışılaraq bu sahədə əməkdaşlığın daha da inkişaf etdirilməsi baxımından yaxşı perspektivlərin mövcudluğu bildirilib və münasibətlərimizin bundan sonra da genişlənəcəyinə əminlik ifadə olunub. Prezident İlham Əliyev Küveyt dövlətinin baş naziri şeyx Nasir əl-Məhəmməd əl-Əhməd əs-Sabah ilə də görüşüb. Danışqlarda ölkələrimiz arasında iqtisadi əlaqələrin genişlənməsi üçün yaxşı potensialın olduğu bildirilib.
Azərbaycanın dövlət başçısının Küveytə rəsmi səfərinin əhəmiyyətinin xüsusi vurğulandığı görüşdə ikitərəfli əlaqələrin bundan sonra da genişlənəcəyinə əminlik ifadə edildi. Prezidenti İlham Əliyevin Küveyt Dövlətinin əmiri şeyx Sabah əl-Əhməd əl-Cabir əs-Sabahla görüşündən sonra isə Azərbaycan Prezidentinin və Küveyt Dövləti əmirinin yüksək dövlət ordenləri ilə qarşılıqlı təltif edilməsi mərasimi oldu. Ali dövlət mükafatlarının təqdim edilməsi başa çapdıqdan sonra isə Azərbaycan Prezidenti İlham Əliyevin və Küveyt dövlətinin əmiri şeyx Sabah əl-Əhməd əl-Cabir əs-Sabahın iştirakı ilə Azərbaycan və Kuveyt hökumətləri arasında bir sıra sahələrdə əməkdaşlığa dair sənədlərin imzalanması olub. /İctimai TV/