BU GÜN BAKIDA AZƏRBAYCANIN KORRUPSİYAYA QARŞI MÜBARİZƏ STRATEGİYASINA DƏSTƏK LAYİHƏSİ ÇƏRÇİVƏSİNDƏ KONFRANS KEÇİRİLİB
[11 fevral 2009]
Azərbaycanın Milli Məclisi, Korrupsiyaya Qarşı Mübarizə üzrə Komissiyası, Avropa Şurası, ABŞ-ın Beynəlxalq İnkişaf Agentliyi və İnkişaf Alternativləri təşkilatının əməkdaşlığı çərçivəsində «Qanunvericilik prosesində səmərəliliyin və şəffaflığın artırılması» mövzusunda konfrans keçirilib. Tədbirdə Azərbaycan hökumətinin korrupsiyaya qarşı mübarizə sahəsində həyata keçirdiyi və perspektivdə nəzərdə tutulan tədbirlər barədə müzakirələr aparılıb.
Tədbirin məqsədi Azərbaycanda qanunvericilik prosesini və yüksək səviyyəli qanunvericilik aktlarının səmərəli qəbul edilməsi və bu prosesin korrupsiyaya qarşı müqavimətinin artırılması üçün təkmilləşmə imkanlarının müzakirəsi idi. Milli Məclis sədrinin 1-ci müavini, Korrupsiyaya Qarşı mübarizə üzrə Komissiyanın üzvü Ziyafət Əsgərov Azərbaycanda korrupsiyaya qarşı mübarizə məqsədilə həyata keçirilən tədbirlər barədə məlumat verərək bildirdi ki, bu istiqamətdə müvafiq qanunvericilik bazası beynəlxalq təşkilatlar, o cümlədən Avropa Şurası ilə əməkdaşlıq çərçivəsində yaradılıb. Azərbaycan Avropa Şurasının «Korrupsiya ilə əlaqədar cinayət məsuliyyəti və mülki hüquqi məsuliyyət haqqında» Konvensiyasını qəbul edib və Korrupsiyaya qarşı Dövlətlər Qrupuna qoşulub. Ölkədə Korrupsiyaya qarşı mübarizəyə dair dövlət başçısının sərəncamları ilə müvafiq Dövlət proqramları təsdiq edilib və həyata keçirilir. Məqsəd beynəlxalq standartlara uyğun olaraq, korrupsiyanın qarşısının alınması və nəzarət vasitəsilə demokratiyaya və qanunun aliliyinə töhfə verməkdir. Avropa Şurasının Əməkdaşlıq Direktorluğunun rəhbəri Marqaret Killerbi Azərbaycanın korrupsiyaya qarşı mübarizə çərçivəsində həyata keçirdiyi tədbirləri, bu sahədə qanunvericiliyin formalaşdırılmasını müsbət qiymətləndirdiyini bildirdi. Bu yaxınlarda Azərbaycan parlamentində «Cinayət yolu ilə əldə edilən pul vəsaitlərinin və ya digər əmlakın leqallaşdırılmasına və terrorçuluğun maliyyələşdirilməsinə qarşı mübarizə haqqında» qanunun qəbul edilməsini bu sahədə görülən işlərə töhvə olacağını deyən Avropa Şurasının nümayəndəsi vurğuladı ki, təmsil etdiyi qurum korrupsiyaya qarşı mübarizədə Azərbaycanla əməkdaşlıqda maraqlıdır. ABŞ-ın Azərbaycandakı səfiri Enn Dersi isə bildirdi ki, Azərbaycanın qanunvericilik prosesində səmərəliliyin və şəffaflığın təkmilləşdirilməsi istiqamətində Milli Məclisin həyata keçirdiyi işlər ölkənin demokratik gələcəyi üçün çox önəmlidir. Birləşmiş Ştatlar bu təşəbbüslərə və səylərə güclü dəstək vermək niyyətini yenidən təsdiqləyir. «Azərbaycan parlamentinin ölkədə qanunvericilik prosesinin səmərəliliyi və şəffaflığına dair mövqeyi haqqında çıxış edən Milli Məclisin Hüquq Siyasəti və Dövlət quruculuğu məsələləri üzrə Daimi Komissiyasının sədri Əli Hüseynov bu sahədə demorkratik prinsiplərin, qabaqcıl beynəlxalq təcrübənin əsas götürüldüyünü bildirdi. Qeyd edək ki, bu sahədə təcrübə mübadiləsinin aparılması baxımından əhəmiyyəti qeyd olunan konfrans Azərbaycanın Korrupsiyaya Qarşı Mübarizə üzrə Strategiyasına dəstək layihəsi çərçivəsində keçirildi. /İctimai TV/