AZƏRBAYCAN PREZİDENTİ İLHAM ƏLİYEVİN KÜVEYTƏ RƏSMİ SƏFƏRİ BAŞA ÇATIB
[11 fevral 2009]
Dövlət başçısı bu gün Bakıya qayıdıb. Qeyd edək ki, prezident İlham Əliyev Küveytə rəsmi səfəri çərçivəsində ötən gün bir sıra görüşlər keçirib, iki ölkə arasında əməkdaşlığa dair 5 sənəd imzalanıb.
Azərbaycan prezidenti İlham Əliyevin Küveytə rəsmi səfəri çərçivəsində iki ölkə arasında əməkdaşlığa dair Birgə komissiyanın yaradılması, sərmayələrin təşviqi və qarşılıqlı qorunması, gəlirlərə və əmlaka görə vergilərə münasibətdə ikiqat vergitutmanın aradan qaldırılması və vergidən yayınmanın qarşısının alınması haqqında sazişlər, Azərbaycan və Küveyt hökumətləri arasında ticarət sazişi və turizm sahəsində əməkdaşlıq haqqında saziş imzalanıb. Qeyd edək ki, prezident İlham Əliyev Küveytdə bu ölkənin əmiri şeyx Sabah əl-Əhməd əl-Cabir əs-Sabahla görüşüb. İki ölkə arasında münasibətlərin inkişaf etdiyi, siyasi əlaqələrin yüksək səviyyədə olduğu bildirilən görüşdə Azərbaycanla Küveyt arasında iqtisadiyyat, ticarət, turizm, sərmayə sahələrində əlaqələrin inkişaf etdirilməsindən danışılıb. Azərbaycanın dövlət başçısı Küveytin baş naziri şeyx Nasir əl-Məhəmməd əl-Əhməd əs-Sabahla da görüşdü. Ölkələr arasında əlaqələrin uğurlu inkişafı vurğulanan görüşdə iqtisadi əlaqələrin genişlənməsi üçün yaxşı potensialın olduğu bildirildi. Prezident İlham Əliyevin Küveyt Milli Məclisinin sədri Casim Məhəmməd əl-Xərafi ilə görüşündə də müxtəlif sahələrdə əlaqələrin inkişafından məmnunluq ifadə olundu, Azərbaycan prezidentinin Küveytə rəsmi səfərinin qarşılıqlı münasibətlərin daha da möhkəmlənməsinə xidmət etdiyi vurğulandı. Azərbaycanın dövlət başçısının Küveyt Ticarət və Sənaye Palatası idarə heyətinin sədri Əli Məhəmməd Sünayən əl-Ğənim ilə görüşündə isə ölkələr arasında siyasi əlaqələrin yaxşı səviyyədə olduğu, beynəlxalq təşkilatlar çərçivəsində əməkdaşlığın genişləndiyi məmnunluqla vurğulandı. Qarşılıqlı iqtisadi-ticarət əlaqələrinin mövcud potensiala cavab vermədiyi qeyd olunan görüşdə bu əlaqələrin genişləndirilməsi üçün konkret tədbirlərin görülməsinin zəruriliyi bildirildi. Küveytdə prezident İlham Əliyevin və Küveyt Dövləti əmirinin yüksək dövlət ordenləri ilə qarşılıqlı təltif edilməsi mərasimi də oldu. Səfər zamanı Küveyt Dövlətinin əmiri şeyx Sabah əl-Əhməd əl-Cabir əs-Sabahın adından Azərbaycan prezidentinin şərəfinə rəsmi ziyafət verildi. /İctimai TV/