KRİMİNAL XƏBƏRLƏR
DİN-İN MƏLUMATI
[13 fevral 2009]
Cəlilabadda ata ov tüfəngindən atəş açaraq oğlunu yaralayıb. Rayonun Qarazəncir kənd sakini 54 yaşlı Qədirağa Qurbanov ailə münaqişəsi zəminində oğlu 21 yaşlı Nərimanı ayağından vurub. Daxili İşlər Nazirliyinin məlumatına görə, hadisəni törədən şəxs tutulub.
*******************
Biləsuvarda ağır yol qəzası baş verib. Ələt-Astara yolunun 91-ci km-də, Xırmandalı kəndinin ərazisində «Mersedes» və «KamAZ» markalı avtomobillər toqquşub. Nəticədə «Mersedes»in sürücüsü hadisə yerindəcə keçinib. Digər sürücü isə xəstəxanaya yerləşdirilib, vəziyyətinin orta-ağır olduğu bildirilir. Ümumilikdə ötən gün ərzində 1 nəfərin ölümü, 6-nın yaralanması ilə nəticələnən 3 yol-nəqliyyat hadisəsi qeydə alınıb.
*******************
Bakıda 5 nəfər bir-birini bıçaqlayıb. Sədərək Ticarət Mərkəzində Yevlax sakinləri-Müşfiq və Pərviz Çərkəzov, Şamaxı sakinləri –Hikmət, Qismət və Zəka Nəbiyev qardaşları xuliqanlıq zəminində biri-birinə xəsarət yetirib. Faktla bağlı araşdırma aparılır.
*******************
Paytaxtın Səbail rayonundakı mağazalrdan birində oğurluq hadisəsi törədilib. Biləcəri qəsəbə sakini Elçin Qasımovun mağazasından 1.100 manat pul və 187 manat dəyərində telefon danışıq kartlarını oğurlayan Bakı şəhər sakinləri -Orxan Babayev, Valeh Əliyev, Ramil Qurbanov və Ruslan Məmmədov tutulub.
*******************
Masallıda narkotik vasitə satan şəxs yaxalanıb. Heroin satarkən saxlanılan və əvvəllər məhkum olunmuş Emin Həsənova narkotik vasitəni satan həmyerliləri Elçin Nuriyev və Rüfət Sadıqov yaxalanıb.
*******************
Naftalanda 1 qumbaraatan mərmisi, 2 mərmi, 4 qumbara, 304 müxtəlif çaplı güllə, 6 güllə darağı və 1 çanta tapılıb.
*******************
Ümumilikdə həyata keçirilən əməliyyat-axtarış tədbirləri nəticəsində ötən gün narkotik və güclü təsiredici maddələrlə əlaqədar 7 cinayət hadisəsi müəyyən edilib, silah, döyüş sürsatı və partlayıcı maddələrlə bağlı 8 fakt aşkarlanıb.
*******************
Ötən gün ərzində 1 adam öldürməyə cəhd, 1 qəsdən sağlamlığa ağır zərər vurma, 1 soyğunçuluq kimi ağır cinayət hadisəsi də daxil olmaqla, ümumilikdə 34 cinayət faktı qeydə alınıb. Həyata keçirilən təxirəsalınmaz tədbirlər nəticəsində onlardan 25-i «isti izlərlə» açılıb. Ötən günlərdən bağlı qalan 1 cinayət faktı da açılıb. Cinayət törətdiklərinə görə 35 nəfər, o cümlədən 18 nəfərdən ibarət 4 qrup tutulub. Bu və ya digər cinayətlərlə bağlı axtarışda olan 9 nəfər də yaxalanaraq istintaq orqanına verilib. Ölkədə kriminogen durum nəzarətdə saxlanılmaqla, ictimai asayişin qorunması və ictimai təhlükəsizliyin təmini istiqamətində tədbirlər davam edir. Xatırladım ki, Daxili İşlər Nazirliyinin «102» xidməti gün ərzində müraciətlərinizi qəbul etməyə hazırdı. Unutmuyaq ki, qanun qorumaq və ona riayət etmək hər birmizin borcudur. /İctimai TV/