KRİMİNAL XƏBƏRLƏR
DİN-İN MƏLUMATI
[18 fevral 2009]
Gəncədə dələduzluqda məşğul olan şəxsin kimliyi müəyyənləşdirilib. Daxili İşlər Nazirliyinin məlumatına görə, Gəncə sakinləri - Ayaz Quliyev və Abil Qəmbərovun etimadını qazanaraq 20 min manatdan çox pulunu alan Kəlbəcər sakini Əli İbrahimov tutulub. Onun ətrafında aparılan əməliyyat tədbirləri nəticəsində məlum olub ki, Əli İbrahimov ötən il isə Gəncə sakini Şamil Əhmədovun 2800 manat pulunu alıb.
**
Bu gecə Bakıda oğurluq etdiyinə görə, tutulan şəxs polisə bıçaqla müqavimət göstərib. Mərdəkan qəsəbəsindəki mağazalardan birindən oğurluq edən Biləsuvar sakini, əvvəllər məhkum olunmuş ƏDALƏT Quliyevin bu hərəktindən sonra polis əməkdaşı havaya xəbərdarlıq atəşi açıb. Görülən tədbirlər nəticəsində ƏDALƏT QULİYEV yaxalanıb. Ondan 1 bıçaq götürülüb.
**
Bakının Şüvəlan qəsəbəsində məskunlaşan Xocavənd sakini MƏMMƏD MƏMMƏDOVUN evindən 4000 manat pul oğurlanıb. Əməliyyat-axtarış tədbirləri nəticəsində, oğurluğun onun həmyerliləri ASİM və AŞON MƏMMƏDOV qardaşları tərəfindən törədilməsi müəyyən edilib.
**
Bakının Sabunçu rayonunda ev sahibi öz evindən oğurluq edib. 31 yaşlı RÜSTƏM SÜLEYMANOV həyat yoldaşının işdə olmasından istifadə edərək görəcəyi işi pərdələmək məqsədi ilə qapının qıfılını sındıraraq evə daxil olub və evdəki videomaqnitafonu və DVD-ni götürərək özündən 12 yaş böyük olan qeyri-qanuni yaşadığı qadının evinə aparıb. Həmin qadından 58 manat pul alan Rüstəm gətirdiyi əşyaları satıb, onun pulunu qaytaracağını bildirib. Törətdiyi əməli etiraf edən Rüstəm əldə etdiyi pulla icarəyə götürdüyü avtomaşının aylıq borcunu ödədiyini bildirib.
**
Sumqayıtda 3 naməlum şəxs Xırdalan sakini SƏRDAR ƏLİYEVİ döyüb. Görülən tədbirlər nəticəsində xuliqanlıq edən Sumqayıt sakinləri - Zaur Mirzəyev, Əfqan Məmmədov və Andrey Musin yaxalanıb.
**
Ümumilikdə həyata keçirilən əməliyyat-axtarış tədbirləri nəticəsində ötən gün narkotik və güclü təsiredici maddələrlə əlaqədar 6 cinayət hadisəsi müəyyən edilib, silah, döyüş sürsatı və partlayıcı maddələrlə bağlı 5 fakt aşkarlanıb.
**
Ötən gün ərzində 2 qəsdən sağlamlığa ağır zərər vurma, 1 soyğunçuluq, 1 xuliqanlıq kimi ağır cinayət hadisəsi də daxil olmaqla, ümumilikdə 35 cinayət faktı qeydə alınıb. Həyata keçirilən təxirəsalınmaz tədbirlər nəticəsində onlardan 22-si «isti izlərlə» açılıb. Cinayət törətdiklərinə görə 28 nəfər, o cümlədən 11 nəfərdən ibarət 4 qrup tutulub. Bu və ya digər cinayətlərlə bağlı axtarışda olan 4 nəfər də yaxalanaraq istintaq orqanına verilib. Ölkədə kriminogen durum nəzarətdə saxlanılmaqla, ictimai asayişin qorunması və ictimai təhlükəsizliyin təmini istiqamətində tədbirlər davam edir. Xatırladım ki, Daxili İşlər Nazirliyinin «102» xidməti gün ərzində müraciətlərinizi qəbul etməyə hazırdı.

Unutmayaq ki, qanun qorumaq və ona riayət etmək hər birmizin borcudur. /İctimai TV/