HƏMSƏDRLƏR AZƏRBAYCANIN BMT BAŞ KATİBİNƏ ÜNVANLADIĞI SƏNƏDLƏRƏ GÖRƏ NARAHATDIRLAR
[20 fevral 2009]
Ermənistan Azərbaycan Dağlıq Qarabağ münaqişəsinin nizamlanmasına dair ATƏT-in Minsk qrupunun həmsədrləri Azərbaycanın BMT baş katibinə ünvanladığı hesabatlarla bağlı bəyanatla çıxış ediblər. Bəyanatda Minsk Qrupunun həmsədrləri Azərbaycanını BMT-dəki daimi nümayəndəsinin təşkilatın baş katibinə ünvanladığı sənədlərdən narahtlığını ifadə edib.
ATƏT-in Minsk Qrupunun həmsədrlərinin bəyanatı qrumun rəsmi İnternet saytında yerləşdirlib. Beynəlxalq vasitəçilər qeyd edirlər ki, 2008-ci il dekabrın 24-də və 29-da Azərbaycanın BMT-dəki daimi nümayəndəsinin sorğusu əsasında yayılan 2 məruzəyə baxmayaraq, Dağlıq Qarabağ probleminin hərbi yolla həlli yoxdur. Həmsədrlər güc tətbiq etməməyi istənilən münaqişənin ədalətli və möhkəm həllinin əsas elementi hesab edirlər. Azərbaycan və Ermənistan prezidentlərinin yanvarın 28-də Sürixdə keçirdikləri sonuncu görüşü faydalı və konstruktiv qiymətləndirdiklərini xatırladan həmsədrlər dövlət başçılarının Minsk Qrupu çərçivəsində gedən sülh prosesinə sadiqliklərini təsdiqlədiklərini və diplomatlardan baza prinsiplərinə dair fikir ayrılıqlarının aradan qaldırılması üçün tərəflərin mövqelərini yaxınlaşdırmasını xahiş etdiklərini vurğulayıb. Həmsədrlər bildirir ki, sornrakı açıq bəyanatlarında da prezidentlər Minsk Qrupunun vasitəçilik səylərinə bağlılıqlarını vurğulayıb. Bu səbəblə həmsədrlər fevralın sonuna qədər əsas prinsiplərin razılaşdırılması cəhdlərini sürətləndirməkdə tərəflərə yardımçı olmaq üçün bölgəyə səfər edəcəklər. Minsk Qrupunun həmsədrləri sülh prosesinin pozulmasına yol verməyəcəklər. Həmsədrlər hesab edirlər ki, yuxarıda bəhs olunan hesabatlar Minsk Qrupu çərçivəsində aparılan danışıqlara və prezidentlərin 2 noyabr 2008-ci il tarixli Moskva Bəyannaməsində əksini tapan öhdəliyə uyğun olaraq münaqişənin dinc və siyasi yolla həllinə təsir göstərməyəcək. Bəyanatda belə deyilir. Qeyd edək ki, söhbət Azərbaycanın BMT-dəki daimi nümayəndəsi Aqşin Mehdiyevin təşkilatın baş katibinə göndərdiyi məktublardan gedir. 24 dekabr 2008-ci il tarixli məktub Ermənistanın Azərbaycana qarşı təcavüzünün hüquqi nəticələri barədə hesabat və ona əlavədən ibarətdir. Aqşin Mehdiyev hesabat və əlavənin BMT Baş Assambleyasının sessiyasının gündəmindəki GUAM məkanında həlli uzanan münaqişələr, onların beynəlxalq sülh, təhlükəsizlik və inkişafa təsiri və Azərbaycanın işğal olunmuş ərazilərində vəziyyətə dair maddələr üzrə assambleyanın və Təhlükəsizlik Şurasının sənədi kimi yayılmasını istəyib. Səfir hesabata əlavəsində BMT-yə Azərbaycan dövləti adından iki sual ünvanlayıb.

-Ermənistan Dağlıq Qarabağ bölgəsində və ətrafında Azərbaycan Respublikasına silahlı hücum edibmi?

- Azərbaycan Respublikası hazırda BMT Nizamnaməsinin 51-ci maddəsinə uyğun olaraq Ermənistan Respublikasından müdafiə olunmaq üçün özünümüdafiə hüququndan istifadə edə bilərmi?

2008-ci il 29 dekabr tarixli məktubda isə Ermənistanın revizionist iddiaları fonunda dövlətlərin ərazi bütövlüyü və millətlərin öz müqəddəratını təyinetmə hüququna dair təməl normalar haqqında məruzə və ona əlavə əksini tapıb.
Qeyd edək ki, sənədlər BMT-nin rəsmi saytında yerləşdirilib. /İctimai TV/