ALMANİYA KANSLERİ ANGELA MERKEL AVROPALI LİDERLƏRİ BERLİNDƏ TOPLAYIB
[23 fevral 2009]
Böyük İyirmiliyin aprel zirvə görüşü ərəfəsində Almaniya kansleri Angela Merkel avropalı liderləri Berlində toplayıb. Əsas müzakirə mövzusu qlobal maliyyə böhranı və zirvə toplantısına hazırlıqla bağlı olub.
Fransa, İtaliya, İspaniya, Böyük Britaniya, Hollandiya, Çexiya və Lüksembruqlu liderlərlə yanaşı Berlin toplantısında Avropa Komissiyasının sədri Joze Manuel Barrozo və Avropa Mərkəzi Bankının direktoru da iştirak edib. Tədbirin təşəbbüskarı Angela Merkel maliyyə böhranının aradan qaldırılması üçün beynəlxalq maliyyə bazarına nəzarət üzrə qlobal mexanizmin yaradılması təklifi ilə çıxış edib. O, dövlətlərin birja əməliyyatlarına fəal şəkildə müdaxilə etmələrini məqsədə uyğun saydığını bildirib. Kansler deyib ki, Almaniyalı mütəxəssislər bu istiqamətdə təkliflər paketi də hazırlayıb. Onlar arasında «risklər atlası» adlı plan da var. Plan birjalarda ən aşağı göstərici müşahidə olunduğu zaman vəziyyətin sürətli şəkildə duzəlməsi istiqamətində bir sıra tədbirlər görülməsini nəzərdə tutur. Berlində avropalı liderlər qlobal iqtisadiyyatın radikal şəkildə sağlamlaşdırılması üsullarını da müzakirə ediblər. Berlin görüşü müəyyən nəticələrlə yadda qalıb. Avropalı liderlər qlobal maliyyə sisteminin tənzimlənməsi qaydalarına dəyişiklik edilməsi, mövcud iqtisadi böhranla miübarizə aparmaq və gələcəkdə analoji halın baş verməsinin qarşısını almaq barədə razılığa gəlib. Qərara alınıb ki, heç bir maliyyə bazarı, məhsulu və payçısı tənzim və nəzarətsiz qalmamalıdır. Bununla yanaşı liderlər Britaniyanın sərmayə şirkətlərinin tənzimlənməsinə müqaviməti qırmağa nail olub. Qeyd edək ki, Berlin görüşündə əldə olunan nəticələr Avropa birliyinə üzv olan digər dövlətlərin liderləri ilə də razılaşdırıldıqdan sonra hüquqi qüvvəyə minəcək. /İctimai TV/