KRİMİNAL XƏBƏRLƏR
DİN-İN MƏLUMATI
[25 fevral 2009]
Mingəçevir şəhərində qətl hadisəsi baş verib. Daxili İşlər Nazirliyinin məlumatına görə, 24 yaşlı Oqtay Fətəliyev münaqişə zəminində həmyerlisi 23 yaşlı Seymur Qocayevi bıçaqla öldürüb. Hadisəni törədən şəxs tutulub.

Bakıda dekabrın 10-da itkin düşən şəxsin meyidi tapılıb. Əməliyyat-axtarış tədbirləri nəticəsində Zığ qəsəbə sakini 51 yaşlı İbadulla Abdullayevi qətlə yetirənlərin Gürcüstan vətəndaşı Fərman Musayev və Şakir Əliyev olduğu müəyyənləşdirilib. Onlar öldürdükləri İbadulla Abdullayevİ Qum Adası ərazisində torpağa basdırıb. Cinayətdə təqsirləndirilən şəxslər tutulub. Qətlin balta ilə törədilməsi aşkarlanıb.
**
Paytaxtın Nərimanov rayonunda isə Bakı sakini 23 yaşlı Elçin İsmayılov münaqişə zəminində 21 yaşlı Zaur Babayevə bıçaqla xəsarət yetirib. Hadisəni törədən şəxs yaxalanıb.
**
Mingəçevir şəhərindəki 12 saylı orta məktəbə partlayıcı maddə qoyulması barədə xəbər təsdiqini tapmayıb. Əməliyyat-axtarış tədbirləri nəticəsində polis idarəsinə zəng edərək bu barədə yalan məlumat verən şəxsin məktəbin 10-cu sinif şagirdi olduğu müəyyən edilib. Barəsində Azərbaycan Respublikası Cinayət Məcəlləsinin terror aktı barədə bilə-bilə yalan məlumat vermə maddəsi ilə cinayət işi açılan həmin şəxs yaxalanaraq istintaqa cəlb olunub.
**
Bu gecə Abşeron rayonunda Bakı sakini Camal Babaşovun «Mersedes» markalı avtomobilində yanğın baş verib. Nəticədə bütövlükdə avtomaşının yanar konstruksiyaları yanıb. Faktla bağlı araşdırma aparılır.
**
Bakıda heroin satan şəxs yaxalanıb. Saxlanılan 51 yaşlı Məhəmməd Muradovun ətrafında aparılan əməliyyat tədbirləri nəticəsində onun evində yaşayan Qazax sakini 44 yaşlı Vüqar Bayramovdan da narkotik vasitə olan heroin götürülüb. Paytaxtın Yasamal rayonunda Bakı sakini 66 yaşlı İlham Tarverdiyevdən isə 1 kiloqram 29 qram tiryək götürülüb.
**
Ümumilikdə həyata keçirilən əməliyyat-axtarış tədbirləri nəticəsində ötən gün narkotik və güclü təsiredici maddələrlə əlaqədar 16 cinayət hadisəsi müəyyən edilib, silah, döyüş sürsatı və partlayıcı maddələrlə bağlı 5 fakt aşkarlanıb.
**
Ötən gün ərzində, 2 qəsdən adam öldürmə, 1 qəsdən sağlamlığa ağır zərər vurma, 2 soyğunçuluq, 4 xuliqanlıq kimi ağır inayət hadisəsi də daxil olmaqla, ümumilikdə 47 cinayət faktı qeydə alınıb. Həyata keçirilən təxirəsalınmaz tədbirlər nəticəsində onlardan 32-si «isti izlərlə» açılıb. Cinayət törətdiklərinə görə 42 nəfər, o cümlədən 7 nəfərdən ibarət 3 qrup tutulub. Bu və ya digər cinayətlərlə bağlı axtarışda olan 10 nəfər də yaxalanaraq istintaq orqanına verilib. Ölkədə kriminogen durum nəzarətdə saxlanılmaqla, ictimai asayişin qorunması və ictimai təhlükəsizliyin təmini istiqamətində tədbirlər davam edir. Xatırladım ki, Daxili İşlər Nazirliyinin «102» xidməti gün ərzində müraciətlərinizi qəbul etməyə hazırdır. Unutmayaq ki, qanun qorumaq və ona riayət etmək hər birmizin borcudur. /İctimai TV/