HƏMSƏDRLƏR MARTIN 3-DƏ YENİDƏN BAKIYA GƏLƏCƏK
[28 fevral 2009]
Bakıda Azərbaycan rəsmiləri ilə görüşən ATƏT-in Minsk Qrupunun həmsədrləri Metyu Brayza, Yuri Merzlyakov, Bernar Fasye və ATƏT-in fəaliyyətdə olan sədrinin şəxsi nümayəndəsi Anjey Kaspşik işğalçı dövlətin rəsmiləri ilə də danışıqlar aparmaq üçün İrəvana yola düşməzdən əvvəl Heydər Əliyev Beynəlxalq Hava Limanında jurnalistlərin suallarını cavablandırdı. Metyu Brayza: “Bakıda konstruktiv fikir mübadiləsi apardıq. Görüşlərimizdə sülh prosesi üçün müsbət əhval-ruhiyyənin, iradənin varlığının şahidi oldum. Hesab edirəm ki, bu əhval ruhiyyənin İrəvanda da davam etdirə bilsək danışıqlar prosesində nəticə əldə etmək mümkün olacaq. Tərəflərin həll prosesi ilə bağlı təbii ki, öz mövqeyi var, amma onlar danışıqların davam etdirilməsini arzu edirlər”.
Danışıqlar masasında yeni təkliflərin yer almadığını diqqətə çatdıran amerikalı həmsədr prezidentlərin növbəti görüşü barədə konkrent fikir söyləməyin hələ tez oluduğunu dedi. O, Bakıdakı görüşləri zamanı Azərbaycan tərəfinin ötən il dekabrın sonlarında BMT-yə təqdim etdiyi hesabat barədə də müzakirələr apardıqlarını da qeyd etdi.
Bir daha münaqişənin həlli üçün kompromis vacib olduğunu vurğulayan Metyu Brayza bu zaman ədalət prinsiplərinin üstün tutulmasının da zərurilyini bildirdi. ATƏT-in Minsk qrupunun digər həmsədrləri Bernar Fasye və Yuri Merzlyakov isə juranlistlərin onlara ünvanlanan suallarını yalnız səfər proqramını gündəliyini açıqlamaqla cavablandırdı. Qeyd edək ki, Bakıdan İrəvana yola düşən diplomatlar hava şəraiti imkan verəcəyi təqdirdə Xankəndinə getmək niyyətindədirlər. Bundan sonra isə onlar martın 2-də İrəvanda Ermənistanın xarici işlər naziri və prezidenti ilə görüşəcək. Vasitəçilər martın 3-də yenidən Bakıya dönməyi planlaşdırıb. /İctimai TV/