ABŞ-IN ŞƏRQ ŞTATLARINDA DAŞQINLAR, FLORİDA ŞTATINDA İSƏ YANĞINLAR DAVAM EDİR
[13 May, 2008]
ABŞ-ın şərq ştatlarında qasırğa və leysan yağışlarından sonra güclü daşqınlar başlayıb. Evləri su basıb, yollar yuyulub, elektrik xətləri sıradan çıxıb. Bu səbəbdən də Nyu-Cersi, Delaver, Virciniya ştatlarının əhalisi hələ də zülmət içərisindədir. Daşqınlarla bağlı sahilyanı ştatların əhalisi köçürülməyə başlayıb. Təbii fəlakətin hazırda ölkənin mərkəzinə doğru irəlilədiyi bildirilir. Güclü küləklə bağlı Nyu-Yorkun mərkəzi hava limanında aviareyslər təxirə salınıb. Florida ştatında meşə yanğınları isə daha da güclənib. Yanğın 3 evi tamamilə məhv edib. Xəsarət alanların olmadığı bildirilir. Ştatda fövqəladə vəziyyət elan edilib. Təkcə Deyton-Biç şəhərində 500 evin əhalisi yaşayış yerini tərk etməli olub. Ştat polisi federal əhəmiyyətli əsas yolları, ərazilərə girişi bağlayıb. Qeyd edək ki, yanğınların miqyasını kəskin istilər və güclü külək daha da artırır. Yanğının qəsdən törədildiyi ehtimalı da mövcuddur. Yanğını söndürmək üçün bütün qüvvələr səfərbər edilib. Təbii fəlakəti hələ də nəzarət altına almaq mümkün olmayıb. Sinoptiklər daşqınlardan əziyyət çəkən ştatlardan fərqli olaraq Florida ştatında vəziyyətin normallaşacağını proqnozlaşdırır. \İctimai TV\