AŞPA-NIN QIŞ SESSİYASI DAVAM EDİR
[23 Yanvar, 2008]
Qurumun Alt Komitəsinin iclasında isə Dağlıq Qarabağ problemi ilə bağlı görülən işlər müzakirə olunacaq
Avropa Şurası Parlament Assambleyasının qış sessiyası bu gün də işini davam etdirəcək. Qurumun ötən gün keçirilən iclasında Kosovanın statusu məsələsi müzakirəyə çıxarılıb. Müzakirələr zamanı Azərbaycan nümayəndə heyəti ermənilərin Dağlıq Qarabağ münaqişəsinin Kosova problemi ilə eyniləşdirilməsi cəhdinə qarşı çıxıb. Ermənilərin bu cəhdlərinə cavab olaraq Azərbaycan nümayəndə heyətinin üzvü Qənirə Paşayeva bildirib ki, bəzi ölkələr Kosova münaqişəsindən öz maraqları üçün istifadə etməyə çalışır. Nümayəndə heyətinin üzvü qeyd edib ki, Ermənistanlı deputatların Kosova münaqişəsinin tənzimlənməsi modelinin MDB ölkələrindəki münaqişələr, yəni Dağlıq Qarabağ, Abxaziya, Cənubi Osetiya və Dnestryanı münaqişələrin tənzimlənməsi istiqamətində presidentə çevriləcəyi ilə bağlı açıqlamaları böyük təssüf doğurur. Bu ilk növbədə Ermənistan xalqının, Azərbaycanın Ermənistan tərəfindən işğal olunan Dağlıq Qarabağ bölgəsində yaşayan və Azərbaycan vətəndaşları olan milliyətcə ermənilərin çaşdırılmasına xidmət edir. Eyni zamanda Dağlıq Qarabağ münaqişəsi ətrafında tərəflər arasında aparılan sülh danışıqlarına ciddi zərbə vurur. Qurumun Dağlıq Qarabağ münaqişəsi üzrə Alt Komitəsinin nəzərdə tutulan iclasında isə problemin həlli ilə bağlı görülən işlər, atılacaq növbəti addımlar nəzərdən keçiriləcək. Həmçinin Azərbaycan və Ermənistan parlament üzvlərinin Dağlıq Qarabağa birgə səfəri məsələsi də müzakirə olunacaq. /İctimai TV/