PREZİDENT İLHAM ƏLİYEV AZƏRBAYCANDA OLİMPİYA HƏRƏKATI VƏ İDMAN MUZEYİNİN YARADILMASI HAQQINDA SƏRƏNCAM İMZALAYIB
[23 Yanvar, 2008]
Dünən Prezident İlham Əliyev Azərbaycanda olimpiya hərəkatı və idman muzeyinin yaradılması haqqında sərəncam imzalayıb. Sərəncamda bildirilir ki, qədim və zəngin tarixə malik Azərbaycan idmanı xalq mədəniyyətinin ayrılmaz hissəsini təşkil edərək milli-mədəni irsimizin çoxsaylı abidələrində öz əksini tapıb. Qobustan qayaüstü rəsmlərindəki təsvirlərdə, Dədə Qorqud dastanlarında və digər folklor mənbələrində fiziki kamillik və sağlam həyat tərzi ilə yanaşı, milli oyunların və idmanın uzaq keçmişindən xəbər verən qəhrəmanlıq nümunələri tərənnüm olunur. Ötən əsrin əvvəllərində pəhləvanlarımızdan Sali Süleyman və Rəşid Yusifovun adları geniş şöhrət tapıb. Sovetlər İttifaqının beynəlxalq olimpiya hərəkatına 1952-ci ildə qoşulması ilə Azərbaycan idmanı daha da inkişaf etməyə başladı. Həmin ildən etibarən idmançılarımız SSRİ yığma komandasının tərkibində 9 olimpiadada iştirak edərək yüksək nəticələr göstərdi və 10 qızıl, 11 gümüş, 7 bürünc medal qazandı. Azərbaycanın idman tarixini və olimpiya hərəkatında əldə etdiyi uğurların mədəni sərvət kimi öyrənilməsi və təbliğinin daha da gücləndirilməsi məqsədilə imzalanan sərəncama əsasən, Gənclər və İdman Nazirliyi, Milli Olimpiya Komitəsi olimpiya hərəkatı və idman muzeyinin tikintisi ilə bağlı təkliflərini hazırlayıb 1 ay müddətində ölkə prezidentinə təqdim etməlidir. /İctimai TV/