ƏŞRƏF HEYDƏROV 20 YANVARA HƏSR ETDİYİ RƏSM ƏSƏRİNİ İSTİQLAL MUZEYİNƏ HƏDİYYƏ EDİB
[23 Yanvar, 2008]
Almaniyada yaşayan soydaşımız, Azərbaycanın əməkdar rəssamı, YUNESKO Rəssamlar Federasiyasının, eləcə də Rusiya və Almaniya Rəssamlar Birliyinin üzvü Əşrəf Heydərov Azərbaycanın qəhramanlıq tarixinin mühüm səhifəsi olan 20 yanvar hadisələrinə həsr etdiyi rəsm əsərini İstiqlal Muzeyinə hədiyyə edib. Bununla bağlı keçirilən mərasimdə çıxış edənlər rəssamın əl işini yüksək qiymətləndirərək əsərin muzeyin ekspanatları içərisində özünəməxsus yeri olacağını bildirib. Qeyd olunub ki, 1990-cı il 20 yanvar hadisələrinin əsl mahiyyətini dünya ictimaiyyətinə çatdırılması baxımından belə əsərlərin ərsəyə gətirilməsi xüsusi əhəmiyyət kəsb edir. Əsərin müəllifi isə bildirib ki, 20 yanvar hadisələri Birləşmiş Ştatlarda baş verən 11 sentyabr terror aktından qəddarlığına görə geri qalmayıb. Bu mənada 18 il bundan öncə baş verən hadisə barədə dünya ictimaiyyətinin daha dolğun məlumat alması vacibdir. Bu işdə Azərbaycanın xaricdə yaşayan mədəniyyət işçilərinin də üzərinə böyük öhdəliyin düşdüyü qeyd olunub. /İctimai TV/