Dünya əhalisinin 3,2%-i, 1 milyon nəfərə qədər olan minlərlə etnik birlikdən ibarətdir. Dünyada bu qədər etnik qrupun olması bir o qədər də psixologiya, etnomədəniyyət, etnik şüur, mentalitet, həyat və davranış tərzinin olması deməkdir. Bu müxtəlifliklərin öyrənilməsi, azsaylı xalqların milli mədəni dəyərlərinin geniş ictimai sferada təbliği, yaşadılması, müasir dünyada demokratik inkişafın başlıca prinsipinə və tələbinə çevrilib.
Artıq hər hansı bir dövlətin demokratik inkişafının bir ölçüsü də onun öz ərazisində yaşayan azsaylı xalqlara olan münasibətidir. Dünyanın əksər çoxmillətli dövlətləri sırasında Azərbaycan Respublikası da var. Bu gün Azərbaycan yerli aborigen tayfa birləşmələri və xalqlarla yanaşı öz taleyini bu torpağa bağlayan bir sıra milli azlıqların, azsaylı xalqların və etnik qrupların da doğma vətəninə çevrilib.
Ölkə teleməkanında ilk dəfə olaraq, məhz İctimai Televiziyada Azsaylı Xalqlar üçün Verilişlər Departamenti yaradılıb. Departamentə Rauf Rəcəbov rəhbərlik edir.
Ölkə teleməkanında ilk dəfə olaraq məhz İctimai Televiziyada Azərbaycanda yaşayan xalqların və etnik qrupların maddi mədəniyət nümunələrini, milli məişətini geniş ictimaiyyətə çatdırmaqla biz uzun əsrlər boyu ölkəmizdə yaşayan, hətta onun bir və ya bir neçə kəndində məskunlaşan, sayı bir neçə mindən artıq olmayan, bu zəngin etnik müxtəlifliyi dünya ictimaiyyətinə catdırırıq.
Departamentin təqdimatında “Azərbaycanlılar”, “Bura vətəndir”, “Danışan tarix” adlı verilişləri tamaşaçılar böyük maraqla gözləyirlər.

“Azərbaycanlılar” verilişi:
İndiyə kimi departamentin təqdimatında hər həftənin cümə axşamı saat 21:30-da efirə gedən “Azərbaycanlılar” verilişində ölkəmizdə yaşayan azsaylı xalqların, milli azlıqların və etnik qrupların adət-ənənəsi, folkloru, milli mətbəxi, dili, dini və inanc yerləri haqqında 50-ə yaxın silsilə verilişlər və filmlər hazırlanıb. Azərbaycanın etnik xəritəsində xüsusi yeri olan ölkəmizin şimal bölgəsində yaşayan ləzgilər, tatlar,taleyini bu torpağa bağlayan ölkəmizin cənub bölgəsində yaşayan talışlar, etnik rəngarəngliyinə görə fərqlənən Zaqatala və Qax rayonlarında yaşayan avarlar, ingiloylar, Azərbaycanın Qafqaz dilləri ailəsinin ləzgi qrupuna daxil olan saxurlar, Qəbələ rayonunda yaşayan udilər, Azərbaycanda yaşayan milli azlıqların nümayəndələrindən olan polyaklar, almanlar, ukraynalılar, əsrlər boyu Azərbaycan xalqı ilə qardaşlıq və dostluq şəraitində yaşayan dag yəhudiləri, XX yüzillikdə ağır məhrumiyyətlərlə qarşılaşan, bir neçə dəfə deportasiyaya məruz qalan vətən, yurd sevgisi ilə yaşayan Ahıska türkləri eləcə də ölkəmizdə yaşayan digər xalqlar haqqında hazırlanan verilişlər təkcə həmin xalqların nümayəndələri tərəfindən deyil, bütövlükdə cəmiyyətimiz tərəfindən də çox maraqla qarşılanır.

“Danışan tarix” verilişi:
Azərbaycanın qədimliyini sübut edən, tariximizi yaşadan atributlar sırasında daş səlnaməmizin xüsusi yeri var. Tariximizi bilmək istəyiriksə, mütləq abidələrimizin yaranma dövründən xəbərdar olmalıyıq. Çünki hər daşda, çınqılda bir tarix yatır. Daşların dili ilə keçmişimizdən söhbət açan “Danışan tarix” verilişi də məhz bu istiqamətdə geniş tamaşaçı auditoriyasının maariflənməsinə xidmət edir. Bu veriliş vasitəsilə biz ulu diyarımızın keçmişini, eyni zamanda bu gününü və gələcəyini işıqlandırmağa çalışırıq.

“Bura vətəndir” verilişi:
Azərbaycanımızın gözoxşayan mənzərələri, qədim inanc yerləri, səfalı, həm də ecazkar və möcüzəli təbiətinə heyran olmamaq mümkün deyil. 12 iqilim qurşağından 9-nun yerləşdiyi bu Odlar diyarında əsrarəngiz təbiətin və ecazkarlığın görüşünə atılmış hər bir addım insanı sirli-sehrli dünyaya səyahətə aparır. Bu səyahətinizin məlumatlı və peşəkar bələdçisi – “Bura vətəndir” verilişi artıq sizin ixtiyarınızdadır. Hər həftə efirə gedən “Bura vətəndir” verilişi sizinlə birlikdə Azərbaycanımızı qarış-qarış gəzib dolaşaraq hər bir eldən, obadan xəbər verməklə yanaşı öz geniş tamaşaçı auditoriyasını sirli və ecazkar bir dünyaya səyahətə aparacaqdır.həftənin bazar ertəsi saat 21:30-da “Danışan tarix” və “Bura vətəndir” verilişlərini izləyə bilərsiniz.

Redaktorlar:
Lütfi Şahverdiyev
Vüsal Məmmədov
Ramin Hüseynov
Məhəbbət Hacıyeva

Rejissorlar:
Taleh İsmayıl
Rasim Sultanov
Elçin Həsrətov