Martın 24-ü Yunanıstanın Avroviziya 2008 müsabiqəsində təmsil edəcək müğənnisi Kalamiras İctimai Televiziyanın dəvətilə Azərbaycana promo-tura gəlib. O və onu müşaiyət edən nümayəndə heyəti (Yunanıstanın İctima kanalının nümayəndələri) 3 gün Bakıda qaldılar, həm lazımınca işlədilər həm lazımınca dincəldilər.
Bu Kalamirasın Azərbaycana ilk səfəri olmaqla yanaşı həm də bu onun promo-tur məqsədilə gəldiyi ilk ölkədir. Bazar günü İçəri Şəhərdə gəzinti və çəkilişlərdən sonra Yunan qonaqlar İctimai Televiziyaya gəldilər. “Eurovision news” proqramında Azərbaycanı təmsil edəcək Samir və Elnurla birgə iştirak etdikdən sonra Kalamiras və onun komandası Televiziyanın baş direktoru cənab İsmayıl Ömərovla görüşdülər. Hədiyyələr təqdim edildikdən və xatirə şəkilləri çəkdirildikdən sonra qonaqlar milli mətbəxi dadmaq üçün paytaxt restoranlarından birinə dəvət olundular. Həm mətbəximizdən, həm musiqimizdən həm də şəhərimizdən məmnun qalan qonaqlar öz sevinclərini gizlədə bilmirdilər.
Gələn iki gün ərzində İcitmai kanala gələn Kalamirasa yerli media nümayəndələri görüşmək imkanı yaradıldı. Müğənni “First News” agentliyi, Lider (“Kim? Nə? Harada?”), ANS (“Salam Azərbaycan”), ATV (“Onlar”), AzTV (“Xəbər var”) kanalları, “Exo” və “Yeni Musavat” qəzetlərinə müsahibə verdi, İctimai TV-nin “Qaraj” verilişində iştirak etdi. Təxminən iki gün gərgin işdən sonra Kalamiras öz komandası və İctimai TV-nin nümayəndəsi ilə şəhərə gəzintiyə çıxdılar. Azərbaycandan çoxlu xatirə hədiyyələri aparan qonaqlar ölkəmizə vuruldular və buraya mütləq qayıdacaqlarına söz verdilər.