Mükafatı Baş direktora Türkiyənin ədliyyə naziri Mehmet Əli Şahin təqdim edib
Türkiyənin "Kanal 7" televiziyası və dünyanın 20-dən çox ölkəsində yayılan "Först Biznes" ("First business") beynəlxalq analitik jurnalının birgə təsis etdiyi "Zirvədəkilər-2007" mükafatı qaliblərə təqdim olunub. İctimai Televiziya və Radio Yayımları Şirkətinin Baş direktoru İsmayıl Ömərov da qaliblər sırasındadır. Baş direktor uğurlu fəaliyyətinə görə “Türk dünyasına və türk mədəniyyətinə xidmət” mükafatına layiq görülüb. Mükafatı İ.Ömərova Türkiyənin ədliyyə naziri Mehmet Əli Şahin təqdim edib.
Laureatlar arasında Türkiyə Prezidenti Abdulla Gül, Qaqauz Cumhurbaşqanı Mixayil Formozal, Türkiyənin ədliyyə naziri Mehmet Əli Şahin, Türkiyə Radio Televiziya Üst Qurumunun rəhbəri Zahid Akman, Azərbaycanın Rumuniyadakı səfiri Eldar Həsənov, Azərbaycan Milli Məclisinin deputatı Şəmsəddin Hacıyev də var.
Aprelin 19-da İstanbulda “Ceylan İntercontinental” oteldə keçirilən təntənəli mərasimdə "Först Biznes" jurnalının baş redaktoru Seyfulla Türksoy deyib ki, çox dəqiq dəyərləndirmədən sonra "Zirvədəkilər 2007"in laureatları seçilib. Sorğu Türkiyədə televiziya tamaşaçıları, QHT nümayəndələri, siyasətçilər və sahibkarlar arasında keçirilib.
"Zirvədəkilər 2007" mükafatının təqdimetmə mərasiminə Rusiya, Qazağıstan, Azərbaycan, Almaniya, Hollandiya, Qırğızıstan, Rumuniya, Moldova, Türkmənistan, Gürcüstan, Ukrayna kimi ölkələrdən 500-ə yaxın dövlət adamı, iş adamı, millət vəkili, diplomat və sənətçilər qatılıb.
Qeyd edək ki, «Zirvədəkilər» mükafatı bundan əvvəl Türkiyənin baş nazir Rəcəb Teyyub Ərdoğan, Türkiyənin keçmiş xarici işlər naziri İsmayıl Cem, Heydər Əliyev Fondunun prezidenti, millət vəkili Mehriban Əliyeva, Azərbaycanın Fövqəladə Hallar naziri Kəmaləddin Heydərova da verilib.