İsmayıl Ömərov: «Gündoğar ölkə ilə Azərbaycanın belə isti əlaqələrinin olması təqdirəlayiqdir».
Todahiro Abe: «Azərbaycanın demokratikləşmə prosesində İctimai Televiziyanın rolu böyükdür».
«Azərbaycanla Yaponiya arasındakı mövcud əlaqələr yüksələn xətt üzrə inkişaf edir. Sizi əmin edirəm ki, Yaponiya Azərbaycanın ən yaxın və ən etibarlı dostudur». Bu sözləri İctimai Telviziya və Radio Yayımları Şirkətinin Baş direktoru İsmayıl Ömərovla görüşdə Yaponiyanın ölkəmizdəki fövqəladə və səlahiyyətli səfiri Todahiro Abe söylədi. O, Yaponiyanın səfiri kimi iki ölkə arasındakı əlaqələrin daha da inkişaf etməsinə çalışdığını bildirdi.
Baş direktor İsmayıl Ömərov: «Gündoğar ölkə ilə Azərbaycanın belə isti əlaqələrinin olmasını təqdirəlaiq hesab etdi. İctimai Teleradionun qurulması və fəaliyyəti barədə qonağa ətraflı məlumat verən İ.Ömərov yarım illik bir müddətdə böyük işlər görüldüyünü bildirdi: «İTRYŞ-nin yaranması Avropa Şurası tərəfindən qoyulan bir öhdəlik olmaqla yanaşı, həm də sosial sifariş idi. Azərbaycan teleməkanında yeni bir televiziyaya o qədər də ehtiyac duyulurdu. Mövcud televiziyalardan biri dövlət, qalanları isə özəl kanallardır. İnsanlar ictimai teleradio arzusunda idilər. Parlament seçkiləri ərəfəsində fəaliyyətə başlayan televiziya seçki marafonunda çox şəffaf və demokratik rol oynadı. Biz altı ay ərzindəki fəaliyyətimizlə haqqımızda olan bəzi şüpələrə də son qoyduq».
İctimai Teleradionu formalaşdırarkən dünya təcrübəsinin yaxından öyrənildiyini qeyd edən İ.Ömərov Yaponiya ictimai televiziyasının da çox böyük təcrübəyə malik olduğunu bildirdi. Baş direktor şirkətin texniki təchizatının formalaşdırılmasında yapon texnikasından istifadə olunduğunu qonağın diqqətinə çatdırdı. O, Yaponiyanın ictimai televiziyası ilə hələlik əlaqələrin qurulmadığını təəssüflə qeyd edərək yaxın günlərdə bu istiqamətdə mühüm addımlar atılacağına əminlik ifadə etdi. Bununla yanaşı, Baş direktor İctimai Teleradionun beynəlxalq əlaqələrinin qurulduğunu və bir çox ölkələrin ictimai televiziyaları ilə səmərəli əməkdaşlıq edildiyini söylədi.
Səfir Todahiro Abe İctimai Televiziyanı izlədiyini və bundan böyük məmnunluq duyduğunu bildirdi. O, altı ayda İctimai Televiziyanın yaranmasını və böyük inkişaf yolu keçməsini yüksək qiymətləndirdi. Televiziyanın əhalinin maarifləndirilməsində böyük rol oynadığını vurğulayan səfir İctiami Televiziyanın bu istiqamətdə səmərəli fəaliyyət göstərəcəyinə əmin olduğunu dedi: «Azərbaycan 1991-ci ildə müstəqillik əldə etdikdən bəri çalışır ki, demokratik dünyanın əsas üzvünə çevrilsin. Bütün dünya Azərbaycanın demokratikləşmə prosesini izləyir. İctimai Televiziyanın bu işdə rolu böyükdür. Sizə bu çətin və məsuliyyətli işinizdə uğurlar arzulayıram». İctimai Televiziyaya artıq ikinci dəfə gəldiyini xatırladan T.Abe hər gəlişində burada gözəl bir mühitin şahidi olduğunu söylədi. Səfir yaxın günlərdə Yaponiya ictimai televiziyası ilə İctimai Teleradionun səmərəli və dərin mənalı əməkdaşlıq quracağına da əmin olduğunu bildirdi.
Martın 1-dən İctimai Teleradioda irimiqyaslı quruculuq işlərinə başlanıldığını deyən Baş direktor burada Avropadakı studiyaların standartlarına uyğun çəkiliş pavilyonları tikiləcəyini qeyd etdi. Eyni zamanda, səfir İctimai Televiziya ilə bundan sonra daha geniş və səmərəli əməkdaşlıq edəcəklərini vurğuladı.